[27] EPISTOLA XXVII.

Clarissimo Viro, eruditione virtute praestanti

PETRO MEDMANNO,

fratri suo carissimo,
S. D.

Clarissime Vir, & carissime frater, Nunc mihi prolixae epistolae argumentum Cometa praeberet, si ad scribendum satis temporis esset. Accenduntur Cometae vel prope solem, vel in opposito loco. Hic Cometa, quem vidimus primum die Quinto Martii, existimatur accensus esse in Libra opposita Arieti, in quo fuerunt Sol, Saturnus, Mars & Mercurius; profecto horum positu non minus terreor, quam ab ipso Cometa quem nos Vicinum vidimus. •τῳ προτρυγητηρι• postea Arcturo, postea Cynosurae, cauda intuebatur Belgicum. Ante mortem Philippi patrij Caroli Imp. etiam conspectus est Cometa, accensus conjunctione Saturni & Martis. Hoc ipso tempore in Pannonia filius Iohannes obsidione cinxit Cassoviam, & in Franconia nostra rursus bella futura esse, ostendunt apparatus. Marchio Albertus habet auxilia. Sed oro Filium DEI custodem Ecclesiae, ut nos protegat, & si vetus illud metuo •πημα κακος γειτωρ•. Si procedit conventus principum Germaniae, spero futurum ut coram colloquamur. Bene Vale, Carissime Frater, die Coenae in Bethania.

PHILIPPUS.